Header Ads Widget

இணையத்தளம் வேண்டுமா?

Ticker

6/recent/ticker-posts

முல்லையில் கவனயீர்ப்பு போராட்டம்: அரச புலனாய்வாளர்கள் கெடுபிடி








முல்லைத்தீவு மாவட்டத்தில் வலிந்து காணாமல் ஆக்கப்பட்டவர்களின் உறவினர்களால் இன்று மாபெரும் கவனயீர்ப்பு போராட்டம் ஒன்று முன்னெடுக்கப்பட்டது.

2017 ஆம் ஆண்டு மார்ச் மாதம் எட்டாம் திகதி ஆரம்பித்த கவனயீர்ப்பு போராட்டமானது இன்று ஆயிரத்து 200 ஆவது நாளாகவும் தொடர்கிறது.

இறுதி யுத்தத்தின் போது இராணுவத்திடம் கையளிக்கப்பட்டு காணாமல் ஆக்கப்பட்டவர்கள் மற்றும் யுத்தம் முடிவடைந்து வெள்ளைக்கொடியுடன் சரணடைந்து காணாமல் ஆக்கப்பட்டவர்கள், யுத்த காலங்களில் வெள்ளை வான்களில் கடத்தி காணாமல் ஆக்கப்பட்டவர்கள் என பலதரப்பட்ட காணாமல் ஆக்கப்பட்டவர்களினுடைய உறவினர்களால் இப்போராட்டம் முன்னெடுக்கப்பட்டுள்ளது.

ஒப்படைக்கப்பட்ட தமது உறவுகளுக்கு என்ன நடந்தது என்பது தொடர்பில் உரிய பதிலை வழங்குமாறு பல்வேறு போராட்டங்களை முன்னெடுத்த போதும் இதற்கான எந்த வித தீர்வுகளும் இல்லாத நிலையில் தங்களுடைய தொடர் போராட்டத்தை ஆயிரத்து 200 வது நாளாக முன்னெடுத்து வருகின்றனர்.

கொரோனா வைரஸ் அச்சுறுத்தல் காரணமாக சமூக இடைவெளிகளை பேணி, முகக்கவசம் அணிந்து தங்களுடைய நியாயமான கோரிக்கையை முன்வைத்து கவனயீர்ப்பு போராட்டத்தினை முன்னெடுத்திருந்தனர்.

கால அவகாசம் வேண்டாம், முறையான நீதி விசாரணை வேண்டும். அப்பா எங்கே என்று கேட்கும் பாதிக்கப்பட்ட குழந்தைகளுக்கு அரசின் பதில் என்ன? போரின் முடிவில் கையளித்தோர் போரில் இறந்தனர் என்பது பொய் இல்லையா?

சர்வதேசமே இலங்கையை குற்றவியல் நீதிமன்றத்தில் நிறுத்து. என்ற வாசகங்கள் எழுதப்பட்ட பதாதைகளை தாங்கியவாறும் எங்கே எங்கே உறவுகள் எங்கே? வேண்டும் வேண்டும் சர்வதேச விசாரணை வேண்டும், வேண்டும் வேண்டும் நீதி வேண்டும் என பல்வேறு கோசங்களை எழுப்பியவாறு கவனயீர்ப்பு போராட்டத்தை முன்னெடுத்திருந்தனர்.

இதேவேளை கவனயீர்ப்பு போராட்டம் இடம்பெற்ற பகுதியில் அரச புலனாய்வாளர்களின் பிரசன்னம் அதிமாக இருந்ததுடன் போராட்டத்தையும் தமது தொலைபேசிகளில் காணொளிப்பதிவு செய்தமை குறிப்பிடத்தக்கது.

Post a Comment

0 Comments